राहु स्तोत्रम् || Rahu Stotram
राहुस्तोत्रम् के नित्य पाठ करने से जीवन में हर कष्टों से मुक्ति मिलती है व जीवन सुखमय और खुशहाल होता है। यहाँ राहू के लिए दो स्तोत्रम् दिया जा रहा है साधक इनमे से किसी का भी या दोनों का ही पाठ कर सकते हैं।
|| राहुस्तोत्रम् ||
ॐ नमो राहवे ।
नमस्ते दैत्यरूपाय देवारिं प्रणमाम्यहम् ।
नमस्ते सर्वभक्ष्याय घोररूपाय वै नमः ॥ १॥
त्वं ब्रह्मा वरुणो देवस्त्वं विष्णुस्त्वं हरिः शिवः ।
मर्त्यलोके भवान्प्रीतः संसारजनतारकः ॥ २॥
कूटपर्वतदुर्गाणि नगराणि पुराणि च ।
यस्य क्रोधवशाद्भस्मीभवन्ति क्षणमात्रकम् ॥ ३॥
धूम्रवर्णो भवान् राहू रक्ताक्षः पिङ्गलोपमः ।
क्रूरग्रहस्तथा भीमो यमरूपो महाबलः ॥ ४॥
यस्य स्थाने पञ्चमेऽपि षष्ठे चैव तृतीयके ।
दशमैकादशे चैव तस्य श्रेयः करोत्यलम् ॥ ५॥
अन्नं खड्गं च यद्दत्तं राहवे सुफलप्रदम् ।
पृथिव्यां ब्रह्मपीडां च गोपीडां तन्निवारयेत् ॥ ६॥
कृमिकीटपतङ्गेषु चरन्तं सचराचरम् ।
गोदानं भूमिदानं च ह्यन्नं वस्त्रं च दापयेत् ॥ ७॥
सौवर्णरौप्यदानं च कन्यादानं च तत्क्षणात् ।
एतद्दानं च सम्पूर्णं राहुमोक्षकरं नृणाम् ।
अस्य स्तोत्रस्य माहात्म्याद्राहुपीडा विनश्यति ॥ ८॥
रक्ताक्षो धूम्रवर्णाभो विजितारिर्महाबलः ।
अबाहुश्चान्तरिक्षस्थः स राहुः प्रीयतां मम ॥ ९॥
इति राहुस्तोत्रम् सम्पूर्णम् ।
|| राहुस्तोत्रम् ||
अथ राहुस्तोत्रप्रारम्भः ।
ॐ अस्य श्री राहुस्तोत्रमहामन्त्रस्य वामदेव ऋषिः ।
अनुष्टुप्च्छन्दः । राहुर्देवता ।
राहुप्रसादसिद्ध्यर्थे जपे विनियोगः ।
काश्यप उवाच ।
श्रृण्वन्तु मुनयः सर्वे राहुप्रीतिकरं स्तवम् ।
सर्वरोगप्रशमनं विषभीतिहरं परम् ॥ १॥
सर्वसम्पत्करं चैव गुह्यमेतदनुत्तमम् ।
आदरेण प्रवक्ष्यामि श्रूयतामवधानतः ॥ २॥
राहुः सूर्यरिपुश्चैव विषज्वाली भयाननः ।
सुधांशुवैरिः श्यामात्मा विष्णुचक्राहितो बली ॥ ३॥
भुजगेशस्तीक्ष्णदंष्ट्रः क्रूरकर्मा ग्रहाधिपः ।
द्वादशैतानि नामानि नित्यं यो नियतः पठेत् ॥ ४॥
जप्त्वा तु प्रतिमां रंयां सीसजां माषसुस्थिताम् ।
नीलैर्गन्धाक्षतैः पुष्पैः भक्त्या सम्पूज्य यत्नतः ॥ ५॥
विधिना वह्निमादाय दूर्वान्नाज्याहुतीः क्रमात्।
तन्मन्त्रेणैव जुहुयाद्यावदष्टोत्तरं शतम् ॥ ६॥
हुत्वैवं भक्तिमान् राहुं प्रार्थयेद्ग्रहनायकम् ।
सर्वापद्विनिवृत्यर्थं प्राञ्जलिः प्रणतो नरः ॥ ७॥
राहो कराळवदन रविचन्द्रभयङ्कर ।
तमोरूप नमस्तुभ्यं प्रसादं कुरु सर्वदा ॥ ८॥
सिम्हिकासुत सूर्यारे सिद्धगन्धर्वपूजित ।
सिंहवाह नमस्तुभ्यं सर्वान्रोगान् निवारय ॥ ९॥
कृपाणफलकाहस्त त्रिशूलिन् वरदायक ।
गरळातिगराळास्य गदान्मे नाशयाखिलान् ॥ १०॥
स्वर्भानो सर्पवदन सुधाकरविमर्दन ।
सुरासुरवरस्तुत्य सर्वदा त्वं प्रसीद मे ॥ ११॥
इति सम्प्रार्थितो राहुः दुष्टस्थानगतोऽपि वा ।
सुप्रीतो जायते तस्य सर्वान् रोगान् विनाशयेत् ॥ १२॥
विषान्न जायते भीतिः महारोगस्य का कथा ।
सर्वान् कामानवाप्नोति नष्टं राज्यमवाप्नुयात् ॥ १३॥
एवं पठेदनुदिनं स्तवराजमेतं मर्त्यः प्रसन्न हृदयो विजितेन्द्रियो यः ।
आरोग्यमायुरतुलं लभते सुपुत्रान्सर्वे ग्रहा विषमगाः सुरतिप्रसन्नाः ॥ १४॥
इति राहुस्तोत्रम् सम्पूर्णम् ।